ព័ត៌មាន
លោក Fujinaga ពេលព្រឹកនេះបានធ្វើដំណើរទៅជួបកុមារនៅមណ្ឌលមែកឈើ
May 18,2024
លោក Fujinaga Yasuyuki ជាគ្រូការ៉ាត់តេដូ គាត់មានខ្សែក្រវ៉ាត់ខ្មៅមិនដឹងប៉ុន្មានដាន់ទេ! កាលពី ៣០ឆ្នាំមុន។ គាត់សុខចិត្តធ្វើដំណើរពីប្រទេសជប៉ុនមកប្រដាល់ដើម្បីកុមារកម្ពុជា។ នេះជាទឹកចិត្តដែលគាត់បានស្រឡាញ់វិស័យកីឡា និងក្តីមេត្តាចំពោះកុមារខ្មែរ មិនខ្វល់ពីសុខភាពខ្លួនឯងមិនថាការប្រកួតនោះចាញ់ឬឈ្នះទេ។ លោក Fujinaga Kozo បន្តបរិច្ចាគទឹកប្រាក់ Bonus របស់ខ្លួនប្រមាណ ៥០ម៉ឺនយ៉េន (ប្រហែល $៣.២៥០) ចូលមូលនិធិកុមារកំព្រាកម្ពុជានៅព្រឹកមិញនេះ។នៅព្រឹកម៉ោង ១០ ថ្ងៃនេះ ទី១៨ លោក Fujinaga បានធ្វើដំណើរទៅកាន់មណ្ឌលមែកឈើ ដើម្បីជួបកុមារទាំង ១៧៤នាក់ របស់លោក ផន ផល្លា ជាបុរសមានបេះដូងមនុស្សធម៌។ ក្ដីស្រលាញ់អាណិតពិតប្រាកដ កើតចេញពីបេះដូងនិងការយកចិត្តទុកដាក់។ លោក KOZO FUJINAGA មានអាយុ ៦៣ លោកបាននិយាយថា ខ្ញុំដឹងពីកុមារកម្ពុជាក្រីក្រ មានអ្នកខ្លះកំព្រានោះ តាមរយៈមិត្តភ័ក្រ្តរបស់ខ្ញុំ ខ្ញុំមកប្រកួតនៅកម្ពុជានេះ មិនខ្វល់ពីតំលៃខ្លួនអ្វីទេ អ្វីដែលជាគោលបំណងគឺខ្ញុំធ្វើដើម្បីកុមារកម្ពុជា ។ ហើយឆ្នាំ ២០២៥ លោកមានអាយុ ៦៤ ឆ្នាំ ហើយលោកនឹងមកធ្វើការប្រកួតនៅកម្ពុជាដូចពេលនេះទៀត លោកនឹងមកប្រកួតដើម្បីកុមារកម្ពុជាដោយក្តីស្រឡាញ់។ សូមអរគុណលោក KOZO FUJINAGA ដែលមានទឹកចិត្តបេះដូងដ៏ធំសម្រាប់កម្ពុជាយើង៕ អត្ថបទដោយ៖ ទ្រ សុភាព
លោកស្រី Karcz ប្រាប់ថា គ្រប់គ្នាគួរតែមកទស្សនាទន្លេមេគង្គនៃកម្ពុជាម្តងក្នុងមួយជីវិត
May 15,2024
លោកស្រី Joanne Karcz មកបានលេងទេសចរណ៍ក្នុងស្រុកខ្មែរយើង រហូតគាត់បានអារម្មណ៍ថា “ខ្ញុំពិតជាទទួលបានបទពិសោធន៍ក្នុងដំណើរទេសចរណ៍នៅប្រទេសកម្ពុជា វាជាអារម្មណ៍មួយដែលមានតម្លៃលើសពីប្រាសាទអង្គរវត្ត”។ មានបរទេសភាគច្រើនមកលេងអង្គវត្តតែប៉ុណ្ណោះ ប៉ុន្តែដែនដីដ៏មានមន្តស្នេហ៍ក្នុងស្រុកខ្មែរនេះ បានទាញបេះដូងភ្ញៀវទេសចរណ៍ឱ្យមកទស្សនាមានអារម្មណ៍ថាត្រជាក់ចិត្តណាស់។ បន្ទាប់ពីលោកស្រី Karcz បានទៅលេងអង្គវត្តហើយគាត់បានទៅជិះទូកកម្សាន្តតាមដងទន្លេមេគង្គជាផ្នែកមួយនៃសម្រស់នៃប្រទេសកម្ពុជាយើង។ ពេលលោកស្រី Karcz បានធ្វើដំណើរតាមទន្លេមេគង្គដែលសម្លឹងមើលឃើញដីល្បាប់ដែលផ្តល់ឱ្យជីវិតក្មេងៗ បានស្រែកចេញពីច្រាំងទន្លេយ៉ាងរីករាយ ហើយមានសាឡាងដឹកកម្មករជិះម៉ូតូពីច្រាំងមួយទៅច្រាំងមួយទៀត។ ហើយគាត់បានមើលឪពុកម្តាយដែលដឹកដៃកូនតូចមួយឬពីរនាក់ ហើយមានអ្នកនេសាទនៅម្នាក់ឯង ឬនៅជាក្រុមតូចៗ នៅក្នុងទូកតូចធំតាមដងទន្លេមេគង្គ។ អ្វីដែលកាន់តែពិសេសចំពោះអារម្មណ៍គាត់នោះ មានអ្នកនេសាទពីរបីនាក់ងើបឈរគ្រវីដៃស្វាគមន៍មកកាន់គាត់យ៉ាងរីករាយដោយមានស្នាមញញឹមផងដែរ។ជីវិតរស់នៅតាមដងទន្លេរបស់ប្រជានខ្មែរនេះ បានធ្វើឱ្យបេះដូងរបស់គាត់មានការលង់មន្តស្នេហ៍នឹងការទស្សនាមិនចេះធុញអ្វីសោះ។ នេះជាការទស្សនាចំណីភ្នែករបស់លោកស្រី Karcz ដែលធ្វើឱ្យគាត់មានអារម្មណ៍សែនរំភើបខ្លាំងពេលឆ្លងកាត់បទពិសោធន៍ដ៏តម្លៃនេះ។ នេះជាអារម្មណ៍មួយសែនមានតម្លៃខ្លាំងណាស់ដែលជនបរទេសទទួលបានពីប្រទេសរបស់យើងគឺកម្ពុជាជាដែនដីនៃស្នាមញញឹមយ៉ាងកក់ក្តៅបំផុត៕ អត្ថបទដោយ៖ ទ្រ សុភាព
អាកាសធាតុនៅតែក្ដៅមិនបាត់ លោកជំទាវ ឱ វណ្ណឌីន! បង្ហោះសារ ក្រើនរំលឹកឱ្យបងប្អូនថែរក្សាសុខភាពប៉ុន្មានចំណុចនេះ
May 02,2024
នេះបើយោងតាមរយៈគណនីហ្វេបុក របស់ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលនៃព្រះរាជាណាចក្រកម្ពុជា ផុសនាថ្ងៃទី០១ ខែ ឧសភា ឆ្នាំ ២០២៤ បានចែករំលែក សារក្រើន រំលឹកឱ្យប្រជាជនទូទាំងប្រទេស ថែរក្សាសុខភាពរបស់ខ្លួនគ្រប់គ្នា ព្រោះថា ស្ថានភាពកម្ដៅនៅប្រទេសកម្ពុជាយើង នៅឡើងកម្ដៅមិនទាន់បាត់នៅឡើយ។នៅក្នុងសារក្រើនរំលឹកនោះ មានខ្លឹមសារដូចតទៅ«នៅកម្ពុជាពេលនេះ គឺអាកាសធាតុបានប្រែទៅជាក្តៅបំផុតមិនធ្លាប់មានពីមុនមកនោះឡើយ។ សូមបងប្អូនមានការប្រុងប្រយ័ត្នខ្ពស់លើសុខភាព ដែលអាចនឹងមានការដួលសន្លប់ ឬលេសឡាស់ដោយខ្វះជាតិទឹកក្នុងខ្លួនជាដើម។ ការប្រែប្រួលអាកាសធាតុ នាពេលនេះ គឺជាការពិតហើយ។ ថ្ងៃនេះកម្ដៅឡើង អាចដល់ ៤៦ អង្សារសេទៅហើយ ដែលខ្ញុំស្នើសូមឱ្យប្រជាពលរដ្ឋយើង យកចិត្តទុកដាក់ខ្ពស់ក្នុងការការពារសុខភាពផ្ទាល់ខ្លួនឱ្យបានត្រឹមត្រូវតាមការណែនាំរបស់ក្រសួងសុខាភិបាលដែលបានចេញផ្សាយជូនសាធារណជនរួចហើយ ដែលលោកអ្នកអាចស្វែងរកមើលបានតាមទំព័រហ្វេសប៊ុករបស់ក្រសួងផងដែរ។ អ្វីដែលសំខាន់នៅពេលនេះ គឺមិនត្រូវស្ថិតនៅក្រោមពន្លឺថ្ងៃក្តៅខ្លាំងនេះក្នុងរយ:ពេលយូរពេក ដែលនាំឱ្យរលាកស្បែក បែកញើសខ្លាំងពេកធ្វើឱ្យខ្វះជាតិទឹកក្នុងខ្លួន សរីរាង្គកាយមិនអាចទ្រាំទ្របានដែលអាចឱ្យលេសឡាស់ ដង្ហក់ ឬដួលសន្លប់ ហើយគាំងបេះដូងស្លាប់ជាដើម។ ត្រូវរកទីតាំងម្លប់ជ្រក បើនៅក្រៅផ្ទះ ឫអគារ រកកន្សែង ឬក្រម៉ាជ្រលក់ទឹកគ្រប់ដណ្តប់ខ្លួន ឧស្សាហ័បាញ់ទឹកនៅជុំវិញខ្លួន ពិសារទឹកស្អាតឱ្យបានគ្រប់គ្រាន់ពី ២-៣លីត្រក្នុងមួយថ្ងៃ សូមកុំពិសារភេសជ្ជផ្អែមដែលធ្វើឱ្យកំដៅខ្លួនបុគ្គលកើនថែមក្នុងពេលដែលក្តៅខ្លាំងនេះ និងប្រើសម្លៀកបំពាក់ស្រាលស្ដើង ដៃវែង ពាក់មួកការពារកំដៅថ្ងៃ អាចប្រើឡូស្យុងការពារកំដៅថ្ងៃ ឫប្រើឆត្របាំងកំដៅថ្ងៃ។ បើនៅក្នុងផ្ទះ ឫអគារ អាចប្រើកង្ហា ឫម៉ាស៊ីនត្រជាក់ កាត់បន្ថយកំដៅ។ ចៀសវាងការបរិភោគផ្អែមពេក ប្រៃពេក ឫខ្លាញ់ពេក។ សូមជូនពរបងប្អូនប្រជាពលរដ្ឋទាំងអស់មានសុខភាពល្អ រីករាយការកំសាន្តក្នុងថ្ងៃទិវាពលកម្មអន្តរជាតិ ១ ឧសភា ចៀសផុតនូវផលប៉ះពាល់សុខភាពដោយសារកំណើនកំដៅខ្លាំងនាពេលនេះផងដែរ»។ជាចុងក្រោយ សូមបងប្អូនកុំភ្លេចប្រុងប្រយ័ត្នឱ្យមែនទែនជាមួយការឡើងកម្ដៅនេះ ព្រោះប៉ះពាល់ដល់សុខភាពបងប្អូនទាំងមិនដឹងខ្លួនប្រសិនណាបងប្អូនមិនបានតាមដាននឹងប្រុងប្រយ័ត្នខ្ពស់ ជាពិសេសលើកូនតូចកុំឱ្យគាត់លេងទាំងថ្ងៃក្ដៅ គ្រោះថ្នាក់ណាស់៕
មូលហេតុក្រោយពីខ្នងលោកជំទាវ ម៉ៅ ចំណាន ក្លាយជាប្រធានសមាគមសិល្បករខ្មែរអាណត្តិទី៦
May 02,2024
អបអរសាទរ លោកជំទាវ ម៉ៅ ចំណាន ត្រូវជាភរិយាអ្នកឧកញ៉ា គិត ម៉េង ពេលនេះត្រូវបានជាប់ឆ្នោតជាប្រធានសមាគមសិល្បករខ្មែរអាណត្តិទី៦ ប៉ុន្តែមុនក្លាយជាជាប្រធានសមាគមសិល្បករខ្មែរនេះ លោកជំទាវមានការតស៊ូណាស់។ នៅឆ្នាំ១៩៩៨ លោកជំទាវ ចំណាន បានបោះជំហានចូលប្រឡូកក្នុងវិថីសិល្បៈជាអ្នកចម្រៀងតាមភោជនីយដ្ឋាន ហើយដោយសារលោកជំទាវមានទេពកោសល្យខ្ពស់ខាងវិស័យសិល្បៈដោយក្តីស្រឡាញ់ផងនោះក៏បានបោះជំហានបន្តទៅមុខទៀងបានសម្តែងរឿង និងបានចូលក្នុងផលិតកម្មហង្សមាស ផលិតកម្មយូធូ និងផលិតស្ទឹងសង្កែរហូតក្លាយជាពិធីការិនីប្រចាំស្ថានីយទូរទស្សន៍ប៉ុស្តិ៍លេខ៥ នាសម័យនោះផងដែរ។ខ្សែជីវិតរបស់លោកជំទាវ ម៉ៅ ចំណាន មានភាពអត់ធ្មត់សង្កត់ចិត្តខ្លាំងណាស់ ទម្រាំតែល្បីឈ្មោះលើវិស័យសិល្បៈនិងមកដល់ជីវិតបច្ចុប្បន្ននេះ។ នៅខាងក្រោមនេះក៏ជាមូលហតុមួយចំនួនឱ្យលោកជំទាវ ម៉ៅ ចំណាន បានជាប់ឆ្នោតក្លាយជាប្រធានសមាគមសិល្បករខ្មែរនៅអាណត្តិថ្មីនៅពេលព្រឹកថ្ងៃទី២ ឧសភានេះ ដែលទទួលបានសំឡេងគាំទ្ររហូតដល់ ៥២៧ ស្មើនឹង៩៣ភាគរយ ខណៈលោក ផាត់ ដារារដ្ឋ ទទួលបានត្រឹមតែ២៩សំឡេងប៉ុណ្ណោះ ហើយលោក គួច ខេវិនក៏បាន១១សំឡេងដែរ។១. លោកជំទាវ ម៉ៅ ចំណាន ធ្លាប់ជាអ្នកសិល្បៈដ៏ឆ្នើមម្នាក់ទាំងការច្រៀង ទាំងពិធីការិនី និងតារាសម្តែងយ៉ាងពូកែ។ ដូច្នេះហើយ លោកជំទាវមានសមត្ថភាពអាចយល់ពីសុខទុក្ខនិងអាចដោះស្រាយបញ្ហាខាងសិល្បបានល្អបំផុត។២. លោកជំទាវ ម៉ៅ ចំណាន ជាអ្នកសកម្មក្នុងការងារសប្បុរសធម៌ និងជាអ្នកមានបេះដូងក្តីស្រឡាញ់ក្នុងការងារនេះ។៣. កាលពីថ្មីៗ នេះដែរ សម្តេចតេជោ ហ៊ុន សែន ក៏បានបង្ហោះសារថា លោកជំទាវនឹងទទួលបានការគាំទ្រតាមរយៈការបោះឆ្នោះឆ្នោតក្លាយជាសមាគមនេះដោយសារលោកជំទាវមិនចាំបាច់លំបាករឿងថវិកានោះទេ”។ ព្រោះលោកជំទាវ ជាអគ្គនាយិកាប្រតិបត្តិធនាគារឯកទេសវីងផងដែរ។៤. សូម្បីតែមហាជនក៏បានគាំទ្រលោកជំទាវឱ្យក្លាយជាប្រធានសមាគមសិល្បករខ្មែរដែរ។ ពេលនេះក្តីសុបិនបានក្លាយជាការពិតហើយ។ លោកជំទាវ ម៉ៅ ចំណាន បានជាប់ឆ្នោតជាប្រធានសមាគមសិល្បករខ្មែរអាណត្តិទី៦។អ្នកឧកញ៉ា គិត ម៉េង បានបង្ហោះសារចេញពីចិត្តចំពោះការជាប់ជាប្រធានសមាគមរបស់លោកជំទាវ ម៉ៅ ចំណាន ជាភរិយាថា ....ដោយមានការគាំទ្រពីសម្តេចអគ្គមហាសេនាបតីតេជោ ហ៊ុន សែន ខ្ញុំនឹងជួយអូន ចំណាន ដោយស្មោះអស់ពីចិត្ត ព្រមទាំងត្រៀមខ្លួនជាស្រេចក្នុងការផ្តល់ការគាំទ្រឥតងាករេដើម្បីភរិយាខ្ញុំ ជាប្រធានសមាគមសិល្បករខ្មែរ។ យើងរួមគ្នាជាដៃគូ និងជាគ្រួសារមួយ។ យើងមិនត្រឹមតែប្តេជ្ញាចិត្តក្នុងការដឹកនាំប៉ុណ្ណោះទេ ប៉ុន្តែថែមទាំងជួយបន្ថែម និងលើកស្ទួយសហគមន៍សិល្បករខ្មែរដោយក្តីមេត្តា ដោយការលះបង់កម្លាំងកាយចិត្ត និងប្រកបដោយបរិយាបន្ន។ យើងមានមោទនភាពយ៉ាងខ្លាំងដែលយើងទទួលបានឱកាសបំពេញការងារមានប្រយោជន៍ និងតំណាងឱ្យសិល្បកររបស់យើង....។អត្ថបទដោយ៖ ទ្រ សុភាព
ក្រសួងការងារប្រកាស! ឱ្យតាមរោងចក្រ ត្រូវអនុវត្ត៥វិធានការជាបន្ទាន់ ក្នុងអំឡុងពេលអាកាសធាតុក្តៅ
April 29,2024
យោងតាមសេចក្ដីប្រកាសរបស់ក្រសួងការងារ និងបណ្តុះបណ្តាលវិជ្ជាជីវៈ សូមណែនាំ ដល់ម្ចាស់ ឬនាយករោងចក្រទាំងអស់ យកចិត្តទុកដាក់អនុវត្តនូវវិធានការបន្ទាន់ ដោយហេតុថា ដោយអាកាសធាតុនារដូវប្រាំងនេះកើនកម្ដៅនៅទាន់បានធូរស្បើយនៅឡើយ ដូច្នេះហើយ ៤វិធានការនេះត្រូវអនុវត្ត ដើម្បីការពារសុវត្ថិភាពជូនបងប្អូន ដូចខាងក្រោម៖១. ត្រូវបើកទ្វារ បង្អួចទាំងអស់ ឬបន្ថែមកង្ហារបញ្ចេញខ្យល់ ឬបឺតខ្យល់ចេញ ក្នុងអគារធ្វើការ។២. ត្រូវបង្កើនការផ្គត់ផ្គង់ទឹកស្អាតសម្រាប់ពិសាដល់កម្មករនិយោជិត និងណែនាំឱ្យពិសាទឹកឱ្យ បានច្រើន និងញឹកញាប់ យ៉ាងតិច ២លីត្រក្នុងមួយថ្ងៃ ទោះបីមិនស្រេកទឹកក៏ដោយ។៣. ត្រូវបាញ់ទឹកនៅលើដំបូលអគារធ្វើការឱ្យបានយ៉ាងតិច ២ដងក្នុងមួយថ្ងៃ និងត្រូវចាត់វិធានការ ចាំបាច់ផ្សេងៗទៀត ដើម្បីកាត់បន្ថយកម្ដៅជាបន្ទាន់។៤. ត្រូវពិនិត្យប្រព័ន្ធបញ្ចេញបញ្ចូលខ្យល់ទាំងអស់នៅតាមអគារធ្វើការ ដើម្បីធានាថាដំណើរការល្អ និងត្រូវបើកឱ្យដំណើរការយ៉ាងតិច ១ម៉ោង មុនឱ្យកម្មករនិយោជិតចូលធ្វើការ។៥. ត្រូវចាត់បុគ្គលិកទទួលបន្ទុក ត្រួតពិនិត្យឧបករណ៍វាស់ស្ទង់កម្ដៅជាប្រចាំ នៅកន្លែងធ្វើការ។ ក្រសួងការងារ និងបណ្តុះបណ្តាលវិជ្ជាជីវៈ សង្ឃឹមយ៉ាងមុតមាំថា ម្ចាស់ ឬនាយករោងចក្រទាំងអស់ នឹង ចូលរួមអនុវត្តតាមសេចក្តីណែនាំនេះឱ្យបានម៉ឺងម៉ាត់ប្រកបដោយប្រសិទ្ធភាព ក្នុងស្មារតីទទួលខុសត្រូវខ្ពស់៕
ដំណឹងល្អ! ពេទ្យសូវៀត សហការជាមួយពេទ្យអូស្រ្តាលី ចុះវះកាត់ជំងឺស្រុតស្បូន ដុំសាច់ក្នុងស្បូន…
April 23,2024
យោងតាម មន្ទីរពេទ្យមិត្តភាពខ្មែរ-សូវៀតនាថ្ងៃទី២៣ ខែ មេសា ឆ្នាំ២០២៤បានឱ្យដឹងថា ខាងមន្ទីរពរទ្យបានសហការជាមួយក្រុមគ្រូពេទ្យមកពីប្រទេសអូស្ត្រាលី ដើម្បីធ្វើការវះ កាត់ជំងឺរោគស្ត្រី ជូនស្ត្រីដែលមានវិបត្តិតាមកាលបរិច្ឆេទដូចខាងក្រោម៖១.ការពិគ្រោះជំងឺរោគស្ត្រី៖ ចាប់ពីថ្ងៃទី៩ ដល់ថ្ងៃទី១៤ ខែមិថុនា ឆ្នាំ២០២៤។២.ការវះកាត់រោគស្ត្រី៖ ជំងឺស្រុតសរីរាង្គ ដូចជាស្រុតស្បូន ស្រុតប្លោកនោម ស្រុតទ្វារ លាមក ជំងឺហៀរទឹកនោមតាមទ្វារមាស ជំងឺហៀរលាមកតាមទ្វារមាស ជំងឺមិនមាន ទ្វារមាសពីកំណើត ជំងឺប្រដាប់ភេទលូតលាស់មិនប្រក្រតីពីកំណើត ជំងឺរោគស្ត្រី ដុំ សាច់ស្បូន ដុំដៃស្បូន ជំងឺលំបាកមានកូនដែលមានលក្ខខណ្ឌតម្រូវការវះកាត់ និងការវះ កាត់ដោយបោះ ម៉ាស៊ីនអង់ដូស្កូប ចាប់ពីថ្ងៃទី១០ ដល់ថ្ងៃទី១៤ ខែមិថុនា ឆ្នាំ២០២៤ ។ជាចុងក្រោយប្រសិនណាបងប្អូនចាប់អារម្មណ៍ព្យាបាល សូមធ្វើការចុះឈ្មោះសម្រាប់អ្នកជំងឺចាប់ពីថ្ងៃផ្សាយដំណឹងនេះរហូតដល់ថ្ងៃ ទី៨ ខែមិថុនា ឆ្នាំ២០២៤ នៅផ្នែកសម្ភព និងរោគស្ត្រី ឬ តាមរយៈលេខទូរស័ព្ទ០៨៧ ៧០១ ៣៧៣៕